Programm

Donneschdeg 7.10 - Partnerdag

ab 00:00: Depart Bus

Och dëst Joer hu mir fir den Transport op d'REEL zu München Busser organiséiert. Niewent deenen 2 gewinnten Departen zu Ettelbréck an um P+R Boullion, kënnt mat Karlsruhe en neien Tëschestopp dobäi.
D'Auerzäite fir den Depart ass folgend virgesinn :

  • Depart 00:00 Lux-Nord, Deichhalle - Ettelbréck
  • Depart 00:30 Lux-Süd, P+R Bouillon
  • Depart 04:15 Karlsruhe, Hauptbahnhof (Hinterm Hbf/Schwarzwaldstraße)

Wichteg : Mir bieden iech 30 Minutte virum Depart do ze sinn. Dëst Auerzäiten déngen zur Orientéierung. Departen zu Karlsruhe an zu Lëtzebuerg kenne wéinst Verspéidungen a Verkéier variéieren.

08:30: Arrivée München

Parking TUM Garching
Ludwig-Prandtl-Straße 1, 85748 Garching bei München

Solls du eegestänneg ureesen, ass den Treffpunkt um 8:30 um Parking TUM Garching, erreechbar mam Auto iwwert A9 oder mat der Ubahn U6. (Ludwig-Prandtl-Straße 1, 85748 Garching bei München, https://goo.gl/maps/QfSZnSjTgof2a1RDA).

09:45: ACEL Workshops

Och dëst Joer bitt d’ACEL erëm verschidde Workshops op der REEL zu München un. Folgend Theme bitt d'ACEL iech zur Diskussioun un:

  • Events organiséieren zu Lëtzebuerg an am Ausland
    Wéi mir alleguer wësse sinn d’Eventer an eise Studiestied e ganz wichtegen Deel fir d’Studenten zesummenzebréngen an sech ënnereneen auszetauschen. Dofir dëse Workshop deen dir bei der Organisatioun soll hëllefen an dir nei, frësch Ideeë soll ginn. Du stéiss ëfters op déi eng oder aner Schwieregkeet bei der Organisatioun vu Cercleevenementer? Thema, Publicitéit, Succès, Covid-Mesuren, … Du an däi Cercle organiséiert Events fir är Memberen, mee et kommen net souvill Leit wéi gewënscht? Wéi kréien ech méi aktiv Memberen a mengem Cercle? Ech géif erëm gären e Bal mat mengem Cercle organiséieren, mee ech weess net richteg wéi ech mech soll uleeën: Club oder Café, eleng oder mat engem anere Cercle zesummen? Wann s du dir schonn eng vun dëse Froe gestallt hues oder deng eegen Erfarungen iwwer erfollegräich Eventer matdeele wëlls, dann ass dëst de perfekte Workshop fir dech.

  • D'ACEL an d'Kommunikatioun mat de Cerclen
    D’Stagegesetz, de Gebühren Info Service oder d’KFZ Steier sinn Themen déi du schon eng Kéier héieren hues? Du oder däi Cercle kennt nach esou änlech Problemer mat deene Student:innen oft konfrontéiert sinn? Dann ass dëse Workshop genau dee richtege fir dech! All déi Theme goufe vun eise Membren un eis erugedroen a mir hunn mat den zoustännegen Instanze Léisungen ausgeschafft. Mee ginn et nach esou Problemer mat deenen dir oft konfrontéiert sidd a wou dir net méi weider wësst? An déi wichtegst Fro, wei soll ech der ACEL déi Theme matdeelen? Wann s du also wëlls d’Kommunikatioun vun de Cerclë mat der ACEL verbesseren an domat de Student:inne weiderhëllefen da mell dech bei eisem interaktive Workshop un.

  • De Cercle a seng Memberen
    Du an däi Cercle sidd eng motivéiert an engagéiert Ekipp, déi Student:inne wëll zesumme bréngen? Dir wësst, dass et vill Lëtzebuerger Student:innen an äre Studiestied ginn allerdéngs de Wee bis béi ärer Cercle nach net fonnt hunn? Dann ass dat hei, genau dee richtege Workshop fir dech an däi Cercle. Hei soll et virun allem ëm Kommunikatioun tëschent dem Cercle a senge Membere goen. Wéi präsentéieren ech mech mat mengem Cercle op Social Media a wat ass eng gutt Marketingstrategie fir d’Student:inne grad elo no Corona ze motivéieren op Eventer ze kommen. Nieft der Fro wéi ee Memberen un de Cercle banne kann, soll awer och iwwert Fro diskutéiert ginn, wéi een déi aktuell Membere motivéiert kritt dem Comité bäizetrieden.

12:00: Mëttesiessen an der Osteria da Massimo

15:00: Partnerfoire an Owesiessen an der Motorworld München

Eis Partner vun der REEL stellen sech an engem flotte Kader den REELaner vir. Dono wäert et en Walking Dinner gi. En Event wéi d´REEL ass ouni Ënnerstëtzung vu Partnerentreprisen net méiglech an dofir wëlle mir op dëser Platz all eise Partner elo schonn ee grousse Merci fir d’Vertrauen an d’Zesummenaarbecht mat der REEL 2021 soen.

22:00: Soirée privée mat eisen Partner am Maxes²


Freideg 8.10 - Kulturdag

08:00: Visitten

Och dëst Joer si mer frou iech e puer flott Visitten ubidden ze kennen:

  • LRZ
    Den SuperMUC NG ass mat 26,8739 PFLOPS an engem Aarbechtsspeicher vun 719 TByte een vun de schnellsten Héichleeschtungscomputer vun Europa. Bei eiser Visitte duerch de SuperMUC NG gëtt de Fonctionnement vun esou grousse Rechensystemer mat der komplexer Verwaltung vun de Rechenaufgaben an der Stroumversuergung gewisen.

  • Forschungs-Neutronenquelle Heinz Maier-Leibnitz
    D‘Forschungs-Neutronenquelle Heinz Maier-Leibnitz, benannt nom dätsche Physiker Heinz Maier-Leibnitz, a Garching ass mat enger thermescher Leeschtung vun 20 MW de stäerksten dätsche Fuerschungsreakter. Den europawäit eenzegaartege Reakter gëtt vun der TUM bedriwwen an fënnt an der Grondlagenfuerschung an der Physik, Chimie, Bio a Materialwëssenschafte Gebrauch.

  • Lech Museum
    Dat aalt Kraaftwierk weist op enger Gesamtfläche vu 700 Quadratmeter, wéi aus Waasser Stroum gemaach gëtt. D Highlight vun der Ausstellung ass eng Francisturbine mat Generator duerch déi een trëppelen kann.

  • NS-Dokumentationszentrum
    D‘ NS-Dokumentationszentrum steet haut do wou fréier d‘ NSDAP-Parteizentral war an beschäftegt sech mam Nationalsozialismus. En wichtegen Deel vun der Ausstellung ass dobäi d’Roll vun München als „Hauptstadt der Bewegung“ vun der NSDAP an d’Duerchsetzung vum Nationalsozialismus an Däitschland.

12:30: Mëttesiessen am Hans im Glück

14:00: Rallye duerch München

19:30: Owesiessen am Löwenbräukeller


Samsteg 9.10 - Dag vun der Politik

09:30 : Monologe an Diskussiounsronn an der Scholastika

Dëst Joer wäerten de Minister Claude Meisch an den Honorarkonsul vu München, den Här Axel Gränitz eis hier Sicht op d'Thema vun der REEL erklären.

12:30: Mëttesiessen am Weinhaus Neuner

15:30: Table Ronde: Mam Studium fäerdeg, an elo? Lëtzebuerg oder d’Welt?

Vill jonk Leit zu Lëtzebuerg entscheeden sech all Joer fir e Studium am Ausland. Mee bei wäitem net all Student fënnt säi Wee nees op Lëtzebuerg zeréck. Wat hält d’Studenten dovunner of? Ass et den héije Loyer, Restriktiounen um Beruffsmarché oder sinn et ganz aner Beweegungsgrënn? Beaflosst de Choix vum Studium déi spéider Aussiichten op Lëtzebuerg zeréck ze kommen? Wei kann de Lëtzebuerger Staat an Entreprisen assuréieren d’Attraktivitéit vu Lëtzebuerg no a wärend dem Studium ze erhéijen? Ass de Staat wärend dem Studium proaktiv genuch fir Studenten op Lëtzebuerg ze zéien? Bleift de Lien mat Lëtzebuerg bestoen oder geet dee wärend dem Studium verluer? Mir si frou des Themen, ob eiser Table Ronde ënner anerem mam Michel Reckinger, der Deputéierten Djuna Bernard, dem Tom Oswald an dem Minister Claude Meisch ze diskuteieren.

19:00: Owesiessen an Soirée chique an der Reitschule


Sonndeg 10.10 - Schliersee a Retour op Lëtzebuerg

Duerch kuerzfristeg Ännerung hunn mer de Programm Sonndes liicht upasse missen. Folgend fannt dir den aktuell virleefege Programm:

10:30: Slyrs Distillerie an Therme Erding

14:00: Mëttesiessen am Hofbräuhaus**

15:30: Départ Bus Richtung Parking Garching**

16:00: Départ Bus Richtung Lëtzebuerg**

Wéinst der aktueller Covid-Pandemie kann de Programm sech nach kuerzfristeg änneren.