REEL 23 – Interoperabilitéit – Europaiwwergräifend Kompatibilitéit

Transnational Kooperatioun

Vill jonk Leit zu Lëtzebuerg entscheeden sech all Joer fir e Studium am Ausland, woubäi si encouragéiert an ënnerstëtzt gi vum Lëtzebuerger Staat. Mee bei wäitem net all Student fillt sech a senger neier Situatioun wuel an decidéiert eventuell no engem Semester oder 2 d´Land ze wiesselen oder souguer erëm heem op Lëtzebuerg ze kommen. Fir vill Studente stellt sech dann d’Fro wat lo passéiert mat hire schonn ofgeschlossene Kueren. Kënnen déi Fächer zu Lëtzebuerg ugerechent ginn oder muss ee komplett nei ufänken. Kéint d’Unerkennung vum Bachelor Studium zu Lëtzebuerg fir spéider ee Master ze maachen zu Komplikatioune féieren oder ass dat kee Problem?

De Studium am Ausland stellt fir vill Leit den éischte Schrëtt an d’ Selbstännegkeet duer. An dëser entscheedender Zäit ass et wichteg sech senge Méiglechkeete bewosst ze sinn an am schlëmmste Fall ze wëssen, dass een ëmmer rëm op Lëtzebuerg zeréck komme kann. Genau esou wichteg wier et eis awer och ze wëssen, dass ee mat engem Bachelor zu Lëtzebuerg säi Master am Ausland kéint maachen an deen dann och hei unerkannt gëtt. D’Komplexitéit mam wiesselen tëschent Länner a Studien dréckt d’Bereetschaft vu ville Studentinnen erof mol eppes Neies ze probéieren an Europa méi ze erkunden.

Alleng beim Iwwersetzen vun den Dokumenter zu Lëtzebuerg muss en déif an den Porte-Monnaie gräifen. Vill franséichsproocheg Universitéiten an Héichschoulen huelen nëmmen franséich Dokumenter un an gin och nëmmen franséichsprochger eraus. Soumat muss all Student säin Diplom op englesch iwwersetzen loossen. Net sou wéi an aneren Länner an Stied wou alles och op englesch ugeholl an rausgi gëtt.

Wat ass iwwerhaapt vum Bologna-Vertrag gewollt, bzw. sin dei Fuerderungen nach emmer aktuell? Ass ett onbedengt noutwendeg alles selwecht opzebauen, wann en awer als Beispill an Éisterräich mei en Fokus op den alpinen Raum huet wéi aner Länner an Europa, déi op eppes aaneres fokuséieren.

D’Fro déi sech eis am Kontext vun dëser Editioun vun der Reel do natierlech stellt, ass, ob d’transnational Kooperatioun tëscht deenen eenzelnen Systemer besser ka gestalt gin a wat mir als Lëtzebuerger StudentInnen dozou bäidroe kennen. D’ Zil vun der REEL2023 zu Innsbruck ass et, den aktuellen an zukünftege StudentInnen en méi einfacht Studenteliewen ze bidden an deems ett méiglech ass egal wou an Europa mat deenen selwechten Unerkennungen ze studéieren an de Vertrieder vu Politik a Wirtschaft d’ Gedanke vun de Studente matzedeelen.